2014.03.01 Lima City tour

                 
                                                     Peruvian Tai Chi Master

                                                     Dinning with Kiwi girls

                                                       Parque de Amor



2014.03.01 Lima City tour

回想三丶四年前去旅行，每到一地，要同屋企聯絡，就要買 prepaid sim 咭。而家每間旅店都有 wifi，同家人聯絡就話咁易。今朝一早坐喺庭院，一路食早餐，一路 FaceTime 屋企，呢個早餐，又好溫馨噃。

我習慣早起，早餐後即刻去櫃枱攞張地圖，略略請教一下櫃枱職員，就起程行街嘞。旅館離購物大街，只有十分鐘步行路程。

清晨嘅利馬，行人稀少，好多鋪頭都未開。信步行去大街中央公園 Parque Central de Miraflores，公園實在好細，其實冇乜好睇。沿草地旁行人路行入公園，除咗噴水池，雕像等普通嘢，原來有個特點，就係好多貓，而且到處都有貓嘅食糧。草地上、長椅底、水池邊，甚至樹上，都有貓嘅蹤影。佢哋又唔怕人，同人相處得非常融洽。點解咁多貓？原來以前公園好多老鼠，巿政府就請嚟老鼠嘅天敵，計劃十分成功，老鼠嚇到全部移晒民。但係貓貓已經喺公園安居樂業，易請難送，念及佢哋嘅功勞，市民又幾歡迎佢哋，就由得佢哋以此為家喇。

圍住公園嘅一段馬路封閉咗，作為行人專區。近路中噴水池處 Ovalo de Miraflores ，路邊架起帳篷，裏面擺咗十幾架單車 trainers，一問，原來今日有單車活動。我今早，由旅店沿路行過嚟，都見到大路兩旁嘅單車徑，睇嚟，巿政府都十分鼓勵用單車代步。可惜，我陣間有活動，唔可以參加呢個單車活動。

沿行人專區行，馬路中間搭咗個兩米高嘅表演台，上面有一個着住唐裝嘅秘魯人，打緊太極，佢似係師傅，其他徒子徒孫就喺馬路跟住打。咁嘅情景，我影相之餘，即刻坐低欣賞。喺澳洲，見唔少鬼佬自稱太極師傅，但係打得唔三唔四，完全唔係嗰回事。呢位秘魯師傅果然似層層，一招一式，甚有功架。台下徒弟亦跟得好認真。併步按掌收式，大家都報以熱烈掌聲。估唔到中華文化，喺呢度都有承傳。

時間唔早，行個匝後就返旅店，稍作整頓後，登上嚟接嘅小巴，利馬市半日遊，正式開始。小巴一直向北行，導遊同時用西班牙話同埋英文講解，介紹沿途嘅市容、建築，當然，對呢個首都城市略作介紹就唔少得嘞。

唔講唔知，利馬就係建立喺沙漠之上，因為有海風嘅調節，空氣都幾潮濕，但係又絕少落雨，所以呢度冇人帶雨具出街，如果梁蘇記喺呢度開鋪，就肯定執笠。又因為冇雨落，居民建屋時，天台，簷蓬等露天地方，完全唔使考慮斜水問題。

囑目所及，都係幾層高嘅樓宇，絕少高樓大廈。小巴經過商業中心區，見到全利馬最高嘅大樓 Edificio Banco Continental (BBVA)  亦只係 18 層132公呎高，再翻查資料，原來佢亦係全秘魯最高嘅建築物。係咪沙漠上起唔到高樓呢？梗唔係喇，原來利馬市經常地震，點起高樓？咁亦係秘魯好難好完整咁保留歷史遺跡嘅原因。

半日團只得四個鐘，唔期望可以好仔細咁睇得啲乜嘢？架車一路行，導遊小姐喺個咪度叫大家睇左邊睇右邊，個個就頭擰擰兩頭望，但又冇得落車，只係隔住玻璃窗，喺架震騰騰嘅車廂裡面影相，認真狼狽。走馬看花好吊癮，但係都有好處，就係短時間內可以睇到好多嘢，亦知道各個景點嘅大概位置。等一有時間，就可以自己再嚟一次，到時，你要睇幾耐就幾耐喇。

一路向北行十公理，就係舊城區 Historical Central，利馬著名嘅舊嘅建築，好多都集中喺呢度，咁當然亦係多數遊客必到之地。小巴停喺路邊，就到咗第一個參觀點。落車一睇，眼前就係一幢好有殖民地味道嘅花崗石巨柱建築，正門石橫扁雕住「利馬中央貯備銀行」，呢度就係 Central Reserve Bank Museum。地面一層，花階磚、高櫃枱、黑色鐵欄杆圍住寫字枱，活脫脫就係一間銀行嘅佈局，而家當然攞唔到錢。呢度擺咗展覽講述利馬嘅發展歷史。樓下一層，展覽秘魯歷史上各民族所用嘅穿戴、裝飾，從另一個側面反映唔同歷史時期，不同民族嘅差異。我喺呢度略略知道印加古文化嘅丁點皮毛知識，對即將來臨嘅印加之旅大有幫助。呢度免費入場，免費導遊，內容豐富，唔嚟就笨喇。

離開銀行，跟住導遊小姐支旗行去 Plaza Mayor 廣場，導遊小姐約定集合時間，大家就田雞過河⋯⋯各有各撐，四圍去睇嘢咯。

呢度最矚目嘅，當然係廣場中間嗰個銅雕噴水池。利馬多次大地震，震冧晒喲屋，但係點都震唔爛呢個噴水池，佢係利馬市自殖民時期以來，最古舊嘅遺跡。西班牙人初到此地，就造咗呢個噴水池。當時殖民者獨尊耶教，對異教徒殘酷逼害，據說亦發生過獵巫事件。廣場噴水池呢度，曾經係異教徒嘅刑場。

Plaza Mayor 絶對係全秘鲁嘅政治中心，正對噴水池就係總統府 Placio de Gobierno, 西面就係利馬市政府大樓 Placio de Municipal，其他圍繞住廣場嘅都係幾百年嘅歷史建築物。趁有時間，我圍住廣場行一個大運，利馬大敎堂 Catedral de Lima、百年大酒店⋯⋯一一行過⋯⋯門口啫。行一個匝，又到集合時間。  

大家跟住導遊小姐由總統府沿橫街向東行，就到達聖方濟各修院 Convento San Francisco。修院保存得好好，經歷咁多次地震，牆上嘅馬賽克跌完又黐，黐完又跌過，到今日，亭檯樓閣、畫棟雕樑，仲好睇得下，真可惜，修院裏面唔准影相。

沿住寛闊嘅樓梯走上二樓，有個古老圖書館，內有古老藏書二萬五千本，本本都係古董。基於防火嘅原因，圖書館唔准開火點燈，屋頂就用大玻璃窗，直接採光，不過，入黑就唔使讀書嘞。高樓底靠牆書架、半層懸掛式空中窄走廊、可移動旋轉木梯⋯⋯，直頭就係好似睇戲咁，非常有型。

行返落地面，花階磚走廊下面原來係地下墓室 Catatombs 。人死後都好想靈魂得到救贖，葬得愈接近神就愈得到庇蔭，呢種諗法古今皆然。有錢嘅人就藉住捐錢畀教會，而取得教堂底下嘅地下墓室。我哋一路行，一路都見到地面上用鐵柵鎖上嘅私人墓室入口。有錢嘅靈魂就可以安息，咁，啲窮鬼又有冇容身之地呢？呢個教會又幾慷慨，教堂地底亦掘咗個公眾墓室，好等人人都有安息之所。當然，除咗宗教理由，有秩序嘅屍體處理，以預防疾病傳播，亦係重要考慮之一。

沿住狹窄通道，跟住導遊小姐行落公眾墓室，朦朧嘅環境，行過牆邊暗淡嘅小燈膽，映出一排排陰森嘅人影，絕對啱晒墓穴探訪嘅氣氛，夠晒點題。咁耐以嚟，呢度收集咗約七萬五千個屍體，而家已經變成骸骨。擺放骸骨亦有講究。先將好多個頭骨放喺中間作為圓心，其他長骨、頭骨就分別一環環向外散開，就好似一個放射圖案。咁嘅擺設，喺陰森環境中，加添咗些少藝術氣氛。

聖方濟各修院，絕對唔可以錯過，係必遊景點。至此，半日遊又宣告結束，小巴逐一將客人送返酒店。  

我住呢區絕對係旅遊熱㸃，附近食肆林立，唔愁搵唔到好嘢食。我同兩位 Kiwi 女士一齊喺附近一間小餐館食午餐，餐前每人都要咗杯秘魯著名雞尾酒 Pisco sour。呢餐真係好得喎，招呼好，酒菜美味，環境舒服，價錢相宜，個侍應仲好鬼風趣，真係冇嚟錯。

飯後，一齊行出海邊，海邊懸崖下就係高速公路同埋沙灘。大路盡頭處，依住地勢起咗一座大型購物中心，由地面頂層望落去，一層一層睇晒成個商場，真係好多客人，睇個樣，都好旺下喎。沿住崖邊又有一條好長嘅行人／單車徑，三條友漫無目的沿崖邊行下停下，欣賞太平洋海岸利馬嘅市容。眼前都係幾新淨嘅建築，路邊行人衣着光鮮，舉止斯文。我哋行得好舒服，感覺好安全。利馬，同我印象中嘅南美城市，有好大落差。

崖頂路邊雖然窄，但係冇隔幾遠就起咗啲小小公園仔，方便遊人休息又好，睇景又好，市政府果然招呼周到。由商場行半個鐘左右路程，離遠就見到一個大雕塑：係一個席地而坐嘅男士，懷中躺住愛侶，大家攬實親吻，認真纏綿。呢度就係着名嘅愛侶公園 Parque de amor。每年二月十四日情人節，呢度都舉辦接吻大賽，參加者必須保持雕塑嗰個姿勢嚟接吻，時間最長者就勝出。至於佢哋係唔係愛侶，大會當局就管唔到嘞。

漫步行返旅舍，又到開會時間，講解印加古道行嘅概況。一切就緒，又預備新嘅挑戰。

同 Kiwi 雙妹食過晚餐，交換電郵，又講拜拜嘞，大家都喺南半球，算係隔籬鄰舍，又有冇機會再見呢？隨緣喇。返房後，我都要執好嘢，早啲瞓，聽日一早起程⋯⋯

印加古道 Inca Trail ，我嚟喇。

2014.02.27，28 Galápagos Islands to Quito, to Lima, Peru

                                             The last dinner together at Quito

                                                 Gift Market at Quito


2014.02.27，28  Galápagos Islands  to  Quito, to Lima, Peru

今日要離開加拉巴哥斯群島。

全隊人都好識做，早一晚就夾定錢做貼士，又簽好致謝咭。好嚟好去，早餐時就送畀領隊，以示謝意。

Santa Cruz 冇機場。要搭飛機，我哋先要搭巴土，由最南去到最北。島嘅最北端有個渡口，搭街渡過一條幾百米窄嘅海峽，就係一個好細嘅島 Baltra Island。再由渡口搭巴士去機場。沿途一片荒涼，原來小島上乜都冇，就只有一個機場，不過機場都唔算細，好大嘅機都停到，候機室又有冷氣，又有鋪頭，比起我哋最初登島嗰個 St Cristobal 機場，有規模得多。

領隊幫我哋搞掂登機手續，就喺閘口正式講拜拜嘞。呢程機中途又要停 Quayaquil，返到基多市，已經係黃昏。去到旅館，分房整頓後，又到晚餐時間。

全隊人真係最後一晩喇。大家約埋去 Quito 遊客必去嘅夜浦點 La Mariscal ，一齊食晚餐。大家高高興興，又飲又食就不在話下。我哋呢邊四位男士，一共飲咗5大 jugs 生啤，一餐飮咁多啤酒，以乎我都係第一次。臨走前，大家交換電郵，希望日後可以繼續聯絡。不過，我嘅經驗，之後再有聯絡，機會等於零。又咁講，萍水相逢，何需天長地久；曾經擁有，此生無憾矣。

餐後已經好夜，我哋行番出嚟，成街都係人，沉睡嘅城市，周圍烏燈黑火，就呢個小區幾條街，燈火通明，人馬踏踏。區內食肆、酒吧都坐滿人。La Mariscal 呢度果然熱鬧。大家喺街上互相擁抱，就此話別，第二日就各散東西，大家分道揚鑣喇。茫茫人海，或者再次相逢，緣份嘅嘢，點話得埋。不過，加拉巴哥斯七日情，至此，正式劃上句號。

一宿無話。

今日搭下午機，早上叫櫃位幫手預訂的士去機場。本來想再去行多次 Quito 舊城，一出街就落起毛毛雨，興緻大減，舊城已經去過，又揾唔到人導遊，唔再去亦冇乜大損失，就喺附近行下禮品大牌檔喇。似乎全世界都差唔多，禮品店就梗係千篇一律嘅。行咗一個匝，真係買唔落手，影幾張相，到此一遊算嘞。

再行出大街，逛下鋪頭。喺一間食肆開出路邊嘅枱坐低，慢慢嘆一個提早嘅午餐，一邊睇下路人百態，算係今早嘅節目喇。

午後搭的士離開酒店。行咗冇耐，落起滂沱大雨。可能渠務水皮，通街水浸，山邊湧落嚟嘅雨水好似瀑布一樣，的士行過水氹，濺起大幅水濂。嘩，陸上行舟，真係驚有延誤。好彩預鬆咗時間，到咗機場，仲有大把時間。他他條條，喺機埸食些少嘢，就登機。去秘魯咯！

秘魯係厄瓜多爾隣國。由 Quito 向南飛，五個鐘頭就到秘魯首都利馬。  

飛機到達利馬機場 Jorge Chavez International Airport，已經係黃昏時分。閘口有人攞住寫上我嘅名嘅名牌接機，心情特別舒𣈱。

獨行背囊友，抵境機場永遠係最大挑戰。初嚟步到，人生路不熟，除做足功課外，臨場搞清交通工具點去目的地，都要非常小心。機場出口梗係好多人埋嚟兜生意，話可以載你去目的地。邊啲人信得過、邊啲人係賊，實在好難分。再加上言語不通，又真係唔可以粗心大意。所以通常我都盡量預先安排接機，係要畀多些少錢，但係買個心安，買個安全，呢啲錢，冇得慳。

睇網上討論區，話有的士佬載客之後打劫客人，十分恐佈。而家有人由機場大堂護送去停車場，咁就放心哂。小巴再等多幾個人，就起程去旅館。

旅館喺利馬嘅 Miraflores 區，車程約 20 公里。由黃昏行車行到天黑，周末嘅夜晚，四圍塞車，成街都係人，呢 20 公里，行咗成粒鐘。經過酒巴食肆，附近都人來人往。睇嚟，呢區都幾繁盛噃。

聽日下晝要開會，預備印加古道之行，早上都仲有時間四圍去。登記入房後，即刻同櫃位安排聽日上午半日活動。佢不負我所託，好快幫我搞掂個半日利馬市區遊。

返房洗麈瞓覺，不在話下。

XXXXXXXXXXXXXX

過去一個月，家中有急事要辦，遊記暫停，而家繼續。

2014.02.26 Galápagos Islands - back to Santa Cruz

                                       
                                             Beach of Tortuga Bay
                                     

                                     Marine Iguana crawling through the beach

2014.02.26  Galápagos Islands - back to Santa Cruz

今朝要趕船，四點鐘集合，就搭巴士出碼頭。去到碼頭，太陽都未出嚟，周圍仲係黑孖孖。照例，檢查行李，排隊上船，搞下搞下，太陽又跳出水平缐喇。

我一定攰到飛起，三個船尾摩打嘈到死，我居然可以坐喺大飛，由頭瞓到落尾。到我睜開我對荔枝龍（眼)嘅時侯，原來已經到咗 Santa Cruz。旅館好近，只係喺碼頭十分鐘步行之遙，分房整頓後，仲有大把時間食早餐。

今日係喺加拉巴哥斯群島，最後一日活動。早餐後，全隊人一齊去游水。呢度話去游水，都要行成兩粒鐘，先至有得游。重拾我少年時，一大班人，由跑馬地藍塘道出發，行兩粒鐘山路，去南區深水灣游水嘅美好回憶。

離開旅館向西北行。先買定足夠乾糧、零食及食水，再穿過巿區，進入通往 Tortuga Bay 嘅步行徑。入口有管制閘，原來進入小徑前，需要登記。閘口亦有開放時間，係朝六點至晚六點。咁，趕唔切返轉頭，咪要喺沙灘，同蜥蜴、海獅雙宿雙棲？咁又唔駛嘅，原來都有水上的士，即係電船仔，來往市區與海灘之間嘅。

一行十六人，浩浩蕩蕩行上步徑，步行徑係一條約兩米闊，石砌嘅小路。拉條直綫，由市區，穿過生滿仙人掌嘅灌木林，一直去到 Tortuga Bay 沙灘，全長約二千五百公尺。我哋啲後生仔女，就算有時要停低，聽領隊講生態教育課；一粒鐘內就行出沙灘。個沙灘又真係幾長嘅，啲沙都好靚。不過我嚟自袋鼠國，靚沙灘？澳洲大把。

見到沙灘，個個將人字拖、涼鞋，掛喺背囊，打大赤腳，有啲涉水，有啲踢沙，總之就漫步沙灘喇。沙灘唔多人，除咗我哋行沙灘之外，仲有不少海蜥蜴同我哋一齊行。佢哋全部都係由南至北，原來都係去 Tortuga Bay 北面生蛋。行咁遠路去傳宗接代，係要付出代價嘅，途中就見到一隻蜥蜴，伏喺銀色嘅沙灘上，壯烈犧牲。可憐天下父母心，為咗下一代，真係可以連命都唔要。領隊當然又乘機講下天演論。嗱，物競天擇，適者生存，咪係咁囉。

前面小女孩同年輕爸爸行緊沙灘。細路女見蜥蜴爬過，楂往樹枝仔行近，要戲弄蜥蜴。我唔怪佢，細路係殘忍嘅生物，呢啲係佢哋嘅天性。爸爸走近小女孩，擺動食指示意唔可以咁做，再蹲低向佢解釋。冇錯喇，保護環境意識，建立對動物嘅愛心，當然由細開始培養。唔通一個視踐踏人類尊嚴為平常嘅地方，可以建立起對動物嘅愛心咩？

呢個海灘面向太平洋，冇遮冇掩，好好浪，玩滑浪一流。唔怪得有人托住滑板行二千幾公尺嚟滑浪。我哋行過呢個長灘北面盡頭，穿過紅樹林，又有一個較細嘅海灘。呢度係一個海灣，風平浪靜。大家急不及待，換上泳裝，暢泳去也。我？仲企喺樹底，冇帶泳褲，點游？唓，又如何？著住行山短褲跑出沙灘，逐浪去。

沙灘好多 Horse flies，尤其紅樹林呢一帶，佢哋個嘴好似刀片咁利，咬人好鬼痛。咪以為跳咗落水就冇事，我個地中海原來係烏蠅空襲嘅目標。我唔可以成日拍自己個頭，咁樣會黐線㗎。只好經常陸沉，帶埋個地中海潛落水。怕咗你喇。

今日果然悠閒，成班人水中游下傾下，有時又攤喺沙灘，曬下太陽。游到有啲餓，又坐喺樹底食下餅乾。我食得好論盡，啲餅乾碎跌到通地都係，引嚟一群灰黑色嘅雀仔。喺群島咁多日，呢啲雀仔可謂無處不在。佢哋唔多怕人，好多時走上餐台，爭食枱面嘅麪麭碎。我起初以為呢啲係 mocking birds，後來至知，呢啲比 mocking bird 細啲啲嘅雀仔，就係大名頂頂嘅達爾文雀 Darwin's finches。

呢啲雀，比大龜更早引發起達爾文嘅天演理論。逹爾文唔係鳥類學家，但就留意到生活喺唔同嘅島，因為食物鏈唔同，佢哋啲嘴嘅形狀、功用亦唔同。有啲雀個嘴用嚟撕開仙人掌嘅肉，咁就要粗大啲。又有啲要嚟啄開樹皮，咁就要個啄木鳥嘴。又有啲要嚟挑出樹洞裏面嘅蟲，咁就要又細又長。仲有一隻更加神奇，佢哋居然可以截斷幼樹枝，剪裁到適合長度，作為工具，將藏身樹洞內嘅蟲仔剔出嚟食。後來鳥類學家將佢哋分類成十三種唔同嘅達爾文雀。無論目前佢哋嘅嘴係幾咁唔同，佢哋都係來自千百年前嘅共同祖先，好明顯，咁就係自然選擇嘅結果喇。

島上冇天敵、冇競爭者，亦養成佢哋唔怕人嘅性格。我啲餅乾碎有時，唔知點解，咁啱，跌咗落我隻腳背，呢啲雀仔，就會飛落我隻腳上，銜走餅乾碎。我知道島上有規矩，係唔可以餵食野生動物。又唔可以掂佢哋。不過跌落嘅餅碎，應該唔算餵。佢飛嚟企喺我隻腳上，咁，係佢掂我，唔係我掂佢。我應該冇犯規嘅。

中午過後，沿路行番出市區。好好太陽，行完步行徑，條褲都乾晒喇。步行徑出口附近有個展覽館，居然冷氣開放，即刻入去過冷河。展覽館唔大，冇乜人睇，主要展出群島上野生動物分佈嘅資料，當然亦帶出保護動物、保護環境嘅訉息。

好他條咁食個午餐，學下人行出街睇下有乜嘢好買，主要係買畀大小姐。附近有好多銀器小飾物嘅鋪頭，格調時尚，但唔係豪華裝修嗰隻。頸鍊、手鈪、戒指仔等小飾物，幾十蚊、百幾蚊、千幾蚊都有。我邊識睇，又唔知大小姐鍾唔鍾意，最後都係乜都冇買。原來去旅行，買手信係最難嘅決定。

Santa  Cruz 係群島嘅中心大島，佢嘅食街亦係最大嘅。入夜後，成條街封咗唔畀車行。兩邊食肆大大話都有約三十間。門口都擺咗燒烤爐，又有長枱擺滿海鮮以廣招來。亦有賣甜品、沙律、水果、雞尾酒果汁嘅鋪頭夾雜其中。餐枱一字長蛇陣，擺正喺馬路中間。好有港式熟食大牌檔 feel。我要咗個海鮮焗龍蝦。熱辣辣砵仔 hot pot 原個上枱，個汁好香濃。最重要，唔係個餐嘅味道，係個氣氛。呢度，成個天都彌漫住燒烤爐溢出香噴噴嘅煙。成班人坐喺路中心長枱，枱頭嗌到枱尾，你話要幾大聲。島上最後一個晚餐，大家都好開心，飲飽食醉，踱步返歸。

                                    dinner at the Eat Street of Santa Cruz

2014.02.25. Galápagos Islands - Isabela

                                     Caldera of Sierra Negra Volcano

  

                                    Sharks sleeping in the channel

2014.02.25. Galápagos Islands - Isabela

噚日去咗達爾文硏究中心，中心係統籌成個加拉巴哥斯群島嘅保育工作。今日朝早，我哋去另一個保育中心，The Giant Tortoise Breeding Center of Isabela。聽個名就知，呢度嘅主要工作，就係要養大 Isabela 島嘅巨龜。

Isabela 島係最新生成嘅島之一，島上嘅巨龜都嚟自其他不同嘅島。佢哋各據一方，自己演化。各個亞種，仍然未夠時間去融合，好似其他較老嘅島咁，可以生成新嘅亞種。所以呢一個島，自己就就有五個不同嘅亞種。

我問領隊，群島由火山活動生成，雖然係無中生有，但都知道原理。大龜又因乜解究會喺群島出現？

根據 DNA 硏究，加拉巴哥斯巨龜，應該來自南美洲。N咁多年前，估計唔知乜嘢原因，呢啲南美龜，打大風畀暴漲河水冲落海有之，又或者漫步沙灘時畀潮水捲落海又有；總之就跌咗落海。咁啱有兩條洋流，一南一北，由中美巴拿馬，南美亞根廷，都流向加拉巴哥斯群島。烏龜唔識游水，但係好鬼浮，伸長條頸就透到氣，浸佢哋唔死。烏龜又好捱得餓。好耐唔食唔飲都唔死得。當然，有好多仍然會葬身龍宮，做咗龜丞相。但係總有些少可以登陸群島，變成群島嘅開荒龜。

又因為唔同嘅島，有唔同嘅生態，喺漫長嘅演化過程，體型上就有好顯著嘅分別。喺較東面嘅島生活嘅龜，土地較為老化，有泥土，水份充足，有地表植物，又全無天敵。烏龜無憂無慮，只需低頭食草，已經食極都食唔晒。所以心廣體胖，最後變成米幾兩米長嘅巨龜。佢哋雖然愈愈生愈大隻，但外型始終變化唔大。

唔係隻隻嘢咁好彩，有啲沖咗去西面嘅島。新生嘅島，係啱啱凝固咗嘅石頭，冇泥，儲唔到水，地表寸草不生，好彩都有仙人掌咁樣嘅植物。烏龜低頭係冇嘢食，反之，佢哋就要掂高四隻腳，條頸有咁長伸到咁長，咁至食到仙人掌綠色嘅莖部，又或者植物上嘅葉。但係伸長條頸，又會畀個龜殼阻住。喺漫長嘅演化過程，呢啲龜殼，頸嘅部份，由前面睇，就變成一個「凸」字，再加上條頸愈生愈長，咁樣就可以食到較高嘅植物。西班牙人最初上島，見到呢啲「凸」字龜殼，就聯想起馬鞍。由馬頭睇馬鞍，都係一個「凸」字。於是，畀個名呢啲龜，就叫馬鞍喇。西班牙話，馬鞍，就係 Galápagos。而呢堆群島，島上就住滿呢啲 Galapagos ，咁呢笪地方，就叫做龜之島喇。即係乜嘢？咪係 Galápagos Islands 囉。

呢啲龜，佢哋生活喺唔同嘅島，因應唔同嘅演化條件，生成唔同嘅體型，引發達爾文寫成巨著「物種起源」。以上故事唔係我講嘅，我只係執佢口水尾而已。

保育中心，養龜為主，所以就參觀者角度嚟睇，就好睇過 Santa Cruz 島嘅達爾文硏究中心。中心工作人員喺島上唔同地方收集龜蛋，加上編號。孵化後再分開圈養，情況就好似達爾文中心一樣，不過數量就大好多。龜仔就要放喺離地嘅籠裏面養，因為老鼠，同埋蛇都係龜仔嘅天敵。大到七、八歳就可以擺出露天圈養。其實龜嘅食物非常簡單，只係當地土生嘅大塊樹葉、甚至地上嘅草，都係美味佳餚。我哋去睇嘅時候，咁啱係早餐時間。隻隻食到 jap jap 聲，咁多隻龜一齊咬，真係好鬼大聲，睇嚟，一定好好味嘞。

離開保育中心，巴士繼續向北上山。今日要行山，行火山，Sierra Negra 火山。

黑色火山，Sierra Negra volcano 係 Isabela 島，六大活火山之一。2005年10月爆過一次，火山灰飛到三萬六千呎高空。呢個火山非常生猛，過去100年，共爆過8次。溶岩噴得多，火山口就會倒冧，火山就愈嚟愈矮，而火山口邊緣 the rim, 就會加大，叫做陷落火山口 caldera。佢嘅邊緣，圓周45公里，係世界第二大火山口。

巴士喺 Sierra Negra 火山南面停車，成隊人隨即沿小徑行上山，半個鐘左右，就上到火山口邊緣。居高臨下，成個火山口就喺腳下。火山中間地面真係好大，大到好似一個大平原。全個地面都係灰黑色嘅火山石，不少地方仲不斷冒出白煙。領隊話，如果落雨後，成個火山口地面都冒出蒸氣，可知地面有幾熱。全隊人背住火山口影張集體相之後，就繼續沿火山邊緣小徑前行，一邊行，一邊欣賞浩瀚火山口平原。今日陰陰天，唔曬，咁都冇咁辛苦。兩個鐘後，行番出停車場。跳上巴士，今日真係熱，熱風兜口兜面撞埋嚟，個個昏昏欲睡，喺巴士上猛咁釣魚。

午餐後，分成兩隊人。一啲喺附近海灘游水，而我哋就搭摩打船仔，去碼頭對出嘅一群礁石島。

船仔好慢好慢咁繞住礁石到處遊，咁樣可以近距離睇嗰啲企喺崖邊嘅動物。常見嘅就係加拉巴哥斯小企鵝，唯一赤道以北，喺野外生活嘅企鵝。佢哋係世界第二細小嘅企鵝，平均身長約19吋。領隊問，最細係邊位？我搶答。梗知喇，就係喺澳洲南部嘅小神仙企鵝 fairy penguin，身長只有13吋。除咗企鵝外，趾高氣揚咁企喺崖上嘅，仲有藍腳鰹鳥 blue footed booby。呢啲雀對腳真係藍得好誇張，喺 YouTube 睇過佢哋求偶時會跳舞，真係幾得意。船仔亦跟住海上嘅動物，海龜、魔鬼魚、企鵝、海獅 ⋯⋯，不停咁出現眼前，呢個真係動物嘅天堂。

船仔埋岸，我哋登陸 Las Tintoreras 島。個島佈滿凝固後嘅原始火山石，稱為塊狀熔岩層 a a lava，咁嘅地形，巗巗巉巉，好難行。如果跌倒，一定周身損晒。所以開咗條小徑方便遊人。人就難行，不過就啱晒海蜥蜴。呢個島，經年吹住潮濕嘅南風 。水氣、礦物鹽，令到灰黑色嘅火山石向南嗰面，生滿一笪一笪白色嘅地衣 lichen。咁嘅顏色環境，最好用嚟掩護蜥蜴蛋，同埋啱啱出生嘅小蜥蜴。沿小徑一路行，到處都係一堆堆嘅蜥蜴群，間中亦睇到孵化咗嘅蛋殼。抬頭一望，喺天空盤旋緊嘅軍艦鳥 frigate birds，就係嚟揾蜥蜴蛋、小蜥蜴作食物。道高一尺，魔高一丈。蒼生萬物就喺互相競爭中進步。

小徑另一邊，遠古火山活動，留下嘅天然水道，竟然係白點礁鯊 White tip reef shark 嘅屋企，水道內佈滿一條一條鯊魚。呢啲鯊魚日間瞓覺，夜晚先出去揾食。我哋倚住欄杆，欣賞鯊魚嘅睡姿。呢度明文寫住，唔准游水，以免騷擾動物生態。人唔准游啫，海獅就可以。一隻海獅由外海爬入水道。海獅走入鯊魚群！你估下，結果會點樣？乜話！啲鯊魚四散奔逃！隻海獅就追住啲鯊魚，原來百厭嘅海獅，就係追鯊魚嚟玩。搞搞震，搞到攰，就雙手擺喺肚皮，喺水面游背泳，個樣鬼咁嘆！⋯⋯，呢度啲生態，真係挑戰我哋嘅常識。

搭船仔去島嘅另一邊，紅樹林包圍住嘅沙州 lagoon，沙堤檔住大海浪濤，沙州好似一個大泳池，水清見底，最啱游水。大家企喺粗糙嘅火山岩石上，換上泳裝，戴上面罩吸管，穿上蛙鞋，snorkeling 去也。

沙州內同海洋又唔同，好淺水，兩、三米水左右。一群群嘅珊瑚魚，就喺身邊游嚟游去。清澈嘅水底，一粒粒海膽，一粒粒海星，睇得清清楚楚。游出去較深水處，三、四隻海龜伏喺海底瞓覺。只係潛落三、四米深，就企喺海龜旁邊。我喺旁邊游，佢喺海底瞓，佢啋你都儍。我哋兜住沙州游一個圈，咁又兩個鐘。

船仔載我哋返碼頭，碼頭邊紅樹林海灣，堆咗一大群藍腳鰹鳥 boobies ，有成百隻啩。有啲喺天空飛、有啲企喺礁石、有啲浮喺水面。佢哋喺空中高速盤旋，忽然掉轉身，頭向下，高速俯衝，直插落水底。咁樣揾食，認真勇猛。

呢個海洋世界，真係熱鬧。

最後一日喺 Isabela 島。夜晚，成班人去食街。各間食肆都將枱櫈擺出路中間，到處都賣緊烤魚、龍蝦等海鮮。成條街都係煙，風味十足。又係一個飲飽食醉嘅夜晚。

2014.02.24 Galápagos Islands - Santa Cruz To Isabela

                                                Lonesome George's Home

                                           Sea Food Stall at Santa Cruz Island

2014.02.24 Galápagos Islands - Santa Cruz To Isabela 

我旅行途中，好少瞓唔著，生寶牀，冇問題；噚晚露營瞓草地，亦冇問題。又係一覺瞓到天光。最早起身係我，執好行裝，食過早餐，成隊人浩浩蕩蕩，搭巴士出番 Puerto Ayora 碼頭。

都話呢個島，我哋主要嚟睇龜，參觀保育中心，梗就係必不可少喇。達爾文硏究中心 The Charles Darwin Research Station, 喺碼頭東邊二十分鐘路程之處，係由國際非謀利組織資助，主要工作梗係想盡辦法去保育島上大龜。硏究中心有資料館介紹保育工作。最有印象嘅係，資料館展出保育與開放旅遊，呢兩個互相矛盾嘅課題。咁就了解到，加垃巴哥斯群島，唔會為咗提高 GDP 而盲目開放旅遊。殺雞取卵？有遠見嘅政府，點會咁蠢，梗係希望長做長有喇。

硏究中心其中一個主要工作，係喺各個島收集龜蛋，帶返中心孵化，再養佢四年，等佢哋有能力保護自己，先至放出野外。龜仔都編晒號碼，確保放返原產地，以維持原來生態。如果有頻危嘅龜種，就養喺硏究中心，好好款待，仲想方設法幫佢哋傳宗接代。當然，其中最具代表性嘅，就係巨龜孤獨約翰 Lonesome George。

群島北部有個小島叫 Pinta Island。因為地理位置嘅関係，呢個島啲龜最快畀人食晒。最初估計，喺二十世紀初，Pinta 亞種巨龜，已經絕種。1959年，有漁民將三隻山羊放咗喺 Pinta 島，用以代替絶咗種嘅 Pinta 巨龜，作為繼續航程嘅食糧，呢啲羊果然好生養，到 1970 年，島上羊口，居然達到四萬！四萬隻羊，要食幾多草！島上嘅生態完全改變，至此，巨龜冇可能喺咁嘅環境生存。搵到Pinta 亞種巨龜嘅可能性，幾乎等於零。

峯迴路轉，至係古仔。1971年，一個歐洲科學家，喺 Pinta 島採集蝸牛標本，居然畀佢發現一隻巨龜，當然即刻向硏究中心報料。1972年，中心人員，將呢隻巨龜帶去硏究中心圈養。經過 DNA 驗明證身，估計佢係世界上獨一無二嘅 Pinta 亞種巨龜。中心科學家，多番嘗試幫佢揾 DNA 接近嘅龜做伴侶，希望佢可以有龜繼後香燈。當時估計佢已經七十歲，仍然雄風猶在。佢不負所託，使伴侶們產下龜蛋。可惜，因為亞種唔同，冇一隻龜蛋可以孵化成功。於是，佢就得到孤獨約翰 Lonesome George 呢個名。

2012年，夜觀星象，有巨星殞落。果然六月廿四日早上，孤獨約翰，以超過百歲之齡安詳離世。佢唔算老，巨龜係可以活到一百七十歲。至此，最後一隻 Pinta 巨龜，正式告別舞台。佢除咗喺歷史留下名聲之外，原來佢仲留低啲龜種。兩隻同佢住埋一齊嘅雌龜，體內仍然留有約翰嘅龜種，科學家要再等三年，至知道約翰有冇「遺腹龜」 。

古仔講完未？未喎。至今，科學家仍然間唔中，發現有啲巨龜，帶有部份 ，甚至一半Pinta 亞種嘅 DNA 。咁，會唔會邊個島上，邊個角落，仲有一隻、幾隻，純種 Pinta 龜喺度做緊嘢呢？⋯⋯？

我哋行到約翰嘅故居。咁又唔係龜去樓空嘅，佢兩隻紅顏知己未亡龜，仲住喺裏面，我哋喺外面都憑吊一番。跟住喺中心，再睇下其他龜呀，蜥蜴呀，咁就完結上午活動。領隊約咗兩點喺碼頭集合後，就各散東西，各有各搵食。

由中心向碼頭行，途中有個魚檔。呢個魚檔我認得，因為我喺YouTube 見過。除咗有人幫趁買魚之外，有海獅企直身，獅頭有時枕喺魚枱上，或者伸入魚檔。又有 Pelican
吊住下巴個大袋企喺魚枱上；又有海鷗，同埋其他食魚嘅水鳥，圍喺附近跳嚟跳去。人類走埋魚檔，就係想食魚。呢群非人類，又何嘗唔係呢，不過佢哋食魚唔駛畀錢。賣魚佬幫客人劏魚時，嗰啲劏剩出嚟嘅嘢，啲動物就會攞嚟食。有一次，賣魚佬斬咗個魚頭，隻 pelican 趁佢招呼緊客人，即刻咬咗個魚頭落自己下巴個袋。佢可能以為收藏得好好，其實佢下巴個袋，就成個魚頭咁嘅樣。賣魚佬一手捉住佢對腳，將佢倒吊，成個魚頭就跌番出嚟。真趣怪。

呢個魚檔，果然過癮。唔怪得圍咗咁多遊客喺度影相。

今日非常熱，坐咗入路邊餐廳，開猛風扇，又幾舒服。凍啤加海鮮，食一個非常悠閒嘅午餐。

大飛兩點離開碼頭，摩打開動，奔向 Isabela Island。Isabela 係加拉巴哥斯最大島，位於群島最西沿。西邊最接近 Galapagos volcanic hotspot ，就係太平洋板塊嘅滙合點。西面島嶼係最新生成嘅土地，亦係火山活動最頻繁嘅地區，島上就有六座活火山。

兩粒鐘後，到達 Isabela Island 嘅Puerto Villamil 碼頭。領隊叫咗架貨車巴士，成班友車去旅館。分房整頓，不在話下。

下午仲有些少時間，成班人坐巴士去紅鶴湖 Flamingo Lake。喺碼頭西面有幾個湖，因為海水倒灌，湖水都係咸水，好多紅鶴以此為家。睇得動物紀錄片多，以為喺湖上，會睇到一望無際都係紅鶴。一落車，好好笑。個湖靜應應，十隻八隻紅鶴，喺湖邊行嚟行去。算喇，當係加映短片。

趁太陽仲未落山，大家朝住夕陽之光，漫步沙灘。有間酒吧仔，開咗枱櫈出沙灘邊。正係歡樂時光，趁平，大家坐低飲啤酒。越飲越 Hi，有團友大破慳囊，買咗每人一個 shot，一二三，眾人一飲而盡，即刻咬片青檸。如是者，輪咗三個 Rounds，幾杯到肚，亂噏廿四，有人更走出沙灘跳舞。酒，果然亂性。我唔識飲酒，厠身其中，都好過癮。

喺沙灘吹水吹到紅日西沉，黑夜來臨。又覺肚餓。馬上移師餐廳，食個晚飯。個個飲飽食醉，尋好夢去。

2014.02.23 Galápagos Islands - Santa Cruz Island

                                                       Beer for the camping

                                                              Wild giant tortoise


2014.02.23 Galápagos Islands - Santa Cruz Island

遊加拉巴哥斯島大致分成兩大方法：其一，住上遊船，每日開到唔同地方活動。咁樣一般比較貴，價錢當然亦視乎遊船有幾豪華。其二就好似一般旅行咁，住喺島上旅店。因為要喺幾個島活動，因此就要四圍搬。住喺島上就梗係平好多，自由度亦大啲，起碼可以四圍去食嘢，又可以自己去行街，唔駛限時限刻等駁艇返上船。

一早起身，執好行李，今日要離開 St Cristobal 去Santa Cruz Island。島與島之間嘅交通就靠大飛快艇，早餐後即刻行出碼頭搭船。碼頭長堤中間有檢查站，原來離開島之前，所有行李都要檢查並用膠帶扣上，嚴格檢疫，以確保島與島之間各自獨特生態環境不受干擾。

一上船，碼頭有督察睇住，個個都乖乖著上救生衣。三個大動力船尾外弦摩打隨即起動，震耳欲聾，兼且打起米幾兩米浪花，大飛一支箭咁開行。船開離碼頭後，我哋呢班甩繩馬騮即刻徐低救生衣，回復自由身。坐船其實都好悶，大部份時間，四圍就係海，睇唔到陸地。而且船程亦唔短，所以途中都提供零食及樽裝水。四粒鐘左右，大飛到達 Santa Cruz Island 最大嘅港口鎮 Puerto Ayora。

呢個島，根本就係一座睡火山，不過佢呢一覺，就瞓咗好耐嘞。據估計，最後一次爆發，係喺一百五十萬年前。Santa Cruz 喺正群島嘅中心位置，面積嚟計，只係第二大，但佢係最多人居住嘅島。同其他島唔同，呢度，除咗主要港口城鎮外，居民亦散居內陸，組成小村落，並以耕種或畜牧為生。

一上碼頭，就有檢查人員，佢哋只須檢査封住行李嘅膠帶，再幫旅客剪斷膠帶，就完成檢查工作。

今日係入內陸露營，所以要喺碼頭小鎭，買些少零食等補給品，而領隊亦要安排巴士去營地，約定時間，大家即刻各散東西，把握些少空閒時間，四圍行行。

海蜥蜴喺路邊、超市門口四圍爬。見得多，都慣喇。又係一個熱辣辣嘅中午，行完街，坐喺碼頭蔭頂等巴士。

巴士由貨車改裝而成，車斗變成坐位，可坐廿人左右。巴士又會接其他客人，來往村落與碼頭之間。巴士離開小鎮之前，先車去一個飲品批發貨倉，我哋要買最重要嘅嘢，啤酒！營地冇碑酒賣，好彩有大雪櫃。成晚流流長，冇啤酒，點過日辰。大家即刻分成小組，夾手夾腳又夾錢，一箱一箱咁買，即刻搬上車，直奔營地。

營地由農莊改成，田地已經荒廢，中心部份就係莊主嘅平房、旁邊嘅大廚房，同埋有蓋、水泥地嘅活動小空間。草地上已經紮咗幾個營，就係我哋今晚嘅睡房。唔駛住酒店，團費又可以計平啲喇。

到達營地後，大家略作整頓，最重要係將啤酒雪入雪櫃。此時，午餐已經預備好，大家乖乖地托住杯碟餐具，排隊埋去攞午餐。咦，好有學校露營 feel 喎。粗粗地，又湯又主菜又甜品，仲有咖啡，算係咁嘞。

嚟呢個島，主要係睇大龜。午餐後即刻搭巴士起程，途中經過一個溶岩洞 Lava tube。呢個洞唔係好特別，又唔係好長，都總算係島上火山活動嘅見證。一場嚟到，大家都落車入去行一行。其實 Santa Cruz 仲有啲更精彩嘅溶岩洞，不過唔啱路線，冇包入行程之內。

呢個溶岩洞唔特別，但係喺洞口就有嘢睇喇。大龜，第一次見到大龜。龜始終怕人，呢隻龜嚟唔切爬入草叢，就喺草地同我哋相遇。我哋企喺度，攞晒相機出嚟對住佢影，佢個頭縮咗一半入龜殼，睥住我哋，以不變應萬變。

人類最初接觸呢啲大龜，主要係航海者唔覺意發現加拉巴哥斯群島。大龜又容易捉，又有豐富蛋白質、脂肪。啲龜幾年唔食嘢都唔死得，最啱捉咗上船做糧食貯備。大龜數目，因此一度下降至危險水平。經過悉心保育後，龜口數目回升，令人欣慰。

成班人影完個龜樣就行番上巴士，回頭一望，大龜先生已經爬咗入草叢。巴士行多一個鐘，停咗喺國家公園一個休憩站，領隊就率領一眾人等，走入草叢樹林，尋找大龜去也。適逢係大龜嘅求偶季節，草叢內，大樹下、池塘邊，都見到出雙入對嘅大龜，正在譜緊愛之戀曲，做緊人生（龜生）大事。真個是到處風光明媚，春色無邊。

原來分辨雌龜雄龜十分容易，除咗雄上雌下之外，雄龜條尾較長；雄龜體形比雌龜大成倍，咁樣先至夠力壓實雌龜。最有趣嘅係，雄龜腹部硬殼係向內凹陷。點解咁奇怪？試想象：如果腹部平坦，當爬上雌性龜背時，必定企唔穩而碌番落地，咁又點行大禮，傳宗接代呢？造物果然周到。

呢次尋龜之旅，不負眾望，果然見到好多大龜。大家都好滿意，兩粒鐘後，返番公園休憩站，歇歇腳，飲杯果汁，幫趁買些少記念品，就搭巴士返回營地。

營地不設 wifi，正所謂 iPhone 無用武之地，食過晚飯，天南地北，大家圍喺飯枱吹水，啤酒一支接住一支，非常高興。

老夫子話：「酒過五旬，菜都冇味」，又係時間瞓覺，走番去自己個營，瞓一個漫天星光嘅覺。咦，今晚之前，最後一次露營，已經係二十年前嘅事⋯⋯。

2014.02.22 Galápagos Islands - Kicker Rock

                                                           Channel between Rocks

                                                     Kicker Rock in my hand

2014.02.22  Galápagos Islands - Kicker Rock

呢啲團好古怪，全程唔係好多活動，係團費包埋嘅。反之，佢會畀好多建議你，即所謂 optional activities ，當然係要另外收費喇。咁樣唔係古惑，我又接受佢呢個做法。一來，佢哋可以將個團費做得較低，使到較窮而又貪玩嘅人，都可以嚟玩。二來，參加者真係可以憑興趣、能力(當然包括經濟能力）去選擇合適嘅活動。例如今日嘅活動，係搭快艇去外島 Kicker Rock 潛水。架快艇全日跟住我哋，又船長，又水手，仲包埋午餐、下午茶。計埋租潛水用具，埋單每人就要畀百幾蚊美金。雖然Kicker Rock 潛水係加拉巴哥斯島嘅重頭節目，我哋呢團仍然有三個人選擇其他活動，咁又真係幾自由嘅。

一早著定 rash suit、泳褲，拎埋潛水用具，成班人浩浩蕩蕩行出碼頭。快艇已經喺碼頭等緊，工作人員搬氣樽上船，亦有政府人員上艇檢查。原來，群島內，所有機動船隻開航次數都有管制，以減少污染。睇嚟，環保工作都做得好認真。

Kicker Rock 喺 Puerto Baquerizo Moreno 鎮嘅西面外海，船程約四十五分鐘。我哋離遠就見到兩嚿石。伶伶仃仃戙喺海中間。兩嚿石中間係一條狹長嘅水道，兩邊石懸崖高約 150公尺，又平又直，由遠處睇，好似一嚿石斬開兩邊，華人一定會叫佢做「試劍石」。我哋喺快艇上離遠見到 Kick Rock 已經好興奮，即刻攞相機出嚟影相就不在話下。

快艇停喺幾百米外，個個坐定定聽潛水領隊講解。

Kicker Rock 其實係冷郤咗嘅火山，再倒陷後所剩低嘅石頭，一大一細企喺海中間。由南面睇，似一隻睡獅，所以西班牙話叫做 León Dormido。但係由北面睇，就似一隻靴，所以英文就叫 Kicker 嘞。

Kicker Rock 係加拉巴哥斯島重點保護區域之一，此處水域禁止商業捕魚。呢度係泠䁔流交界嘅地方，適合好多海洋生物生活。兩石之間狹長水道嘅海底又有好多洞穴，最啱用作藏身之所，亦因此吸引大大小小魚類聚集此地。

快手快腳著上裝備，領隊再三交帶注意事項後，個個即刻跳晒落水。嘩，乜咁凍。我以為赤道海水，凍極有限，所以冇租 wet suit，而家淨係著住 rash suit 同泳褲，真係有啲寒寒地。咁浸法，唔知捱得幾耐。好彩游下游下，真係體會到冷暖流交界，啲水時冷時暖，潛低啲溫度又唔同，加埋陽光普照，我又郁嚟郁去冇時停，都頂得順嘅。

我哋先兜住島嘅外圍游，再穿過兩石之間嘅水道。水面，非常平靜。低頭一睇，水底，完全係另一個世界。就喺海面幾吋深嘅一層，一群一群唔夠一吋長，閃耀住陽光反射嘅魚仔，藍色、綠色、銀色 ⋯⋯，佢哋就喺眼前游嚟游去。我伸手出去，佢哋就避開幾吋，之後又若無其事跟住大隊，順住浪濤繼續游，閃閃發光。唔怪得有啲魚弭，只係一條可以反光嘅金屬假魚，原來真魚睇起嚟，都真係咁上下。又有時見到海鳥張大個口，伸入水中，一路貼住水面飛行。原來咁樣，就可以食到呢一層魚仔。真奇妙。我而家先至發覺，就咁浮喺水面，原來已經喺魚群之中。

如果浄係浮喺水面，低頭居高臨下睇，咁未夠過癮。水面對落兩三米處，就係一群群大大小小嘅魚群，半呎至呎幾兩呎大細。咁上下，我又會潛落去，走入魚群追魚。佢哋只係游快啲啲稍為避開。魚群習慣喺呢種環境生活，知道我根本唔係佢哋嘅獵食者，所以根本唔會怕我。喺水中間，抬頭上下左右四圍望，睇到自己畀魚群包圍，咁先至有「潛」嘅感覺。可借我唔夠氣，好快又要上去唞氣，咁又潛得幾深吖？

我哋由島外邊游入狹長水道，嗰度一定係水晶宮嘅旺角，魚嘅密度比外面大好多。我不停上上落落，間唔中都會飲啲海水。嘩，勁，啲水咸到苦。

游咗入水道一陣，就見到大黑影喺我十幾米處游弋。係鯊魚，米幾長嘅鯊魚！一條，一條，又一條。都驚驚地㗎。好彩，佢哋同我，始終隔住一群又一群各種大小嘅魚。據說，鯊魚腸胃最啱係食魚，對人類，佢哋完全冇興趣咁話。

我見到鯊魚，梗係唔敢潛落去。我哋個領隊就唔同，見有鯊魚，即刻去追。唔好睇佢有個大肚腩，一個鴨潛，好快就落咗四、五米深，而且鬼咁長氣。追就梗追唔到，不過近啲睇都好吖。

再向水道中間游去。十幾米海底處，有一群五、六條鯊魚慢游。再上啲，見到一條有斑點嘅魔鬼魚  eagle ray 游喺鯊魚上面。又見一條、兩條 ⋯⋯ 原來係一群約十條嘅魔鬼魚，慢慢搖住雙翼飄過嚟。然後周圍就係大魚、細魚。大家各有各游，互不侵犯。呢個場面，和諧得好震撼。

記得澳洲鱷魚先生 Steve Erwin ，佢係畀魔鬼魚條毒尾拮死，此時，我點敢潛落去，只係浮喺水面睇大戲。三三兩兩嘅巨型海龜，有時喺海底，有時喺海面慢慢游過。百厭嘅海獅，唔知幾時，由後面，貼喺我身邊一閃而過。嚇得我吖。佢再回頭望下我，好似話，乜嚟㗎，游得咁慢。⋯⋯⋯⋯！咁嘅海底世界，而家親身經歷，一生難忘。

見到有啲團友，手腕帶住水底攝影機。我自己，乜都冇！記番起旅行前，大小姐話送個可以潛水嘅攝錄機畀我。我冇勤力做功課，以為冇用。而家一路游一路後悔，我冇聽佢話。咁壯觀嘅場景，居然唔可以記錄低。真失敗！

游出水道，再喺島旁邊游多一陣。領隊吹一個尖聲口哨，快艇就向我哋駛近，原來時間又到，我哋紛紛游番上快艇。大家都未捨得離開，快艇喺 Kicker Rock 慢慢兜圈，等我哋可以從不同角度影相。影相影到飽，個個換番輕裝，三三兩兩佔據快艇各個位置，曬其太陽可也。快艇高速行駛，我就坐喺船頭，一路飲果汁、食麪麭，一路享受兜口兜面吹埋嚟嘅海風。咁曬法，我又再黑啲喇。

快艇停喺Kicker Rock 對面嘅一個沙灘海邊，船上開咗張長枱，大家一齊食個快艇午餐。之後，由快艇涉水行上沙灘。大家都捲住大毛巾，原來呢度不時都有大烏蠅 horse fly 襲擊，呢啲嘢，咬人鬼死咁痛。個個不時，拍拍聲自己打自己，好鬼趣怪。

沙灘邊可以遠眺 Kicker Rock，個個扮晒嘢，伸出手，影張 Kicker Rock 在我掌上嘅相。漫步沙灘，浪漫完畢，涉水上番快艇，半粒鐘左右，返番碼頭。

開心嘅時光，真係過得快， San Cristobal 島兩日活動又告一段落。聽日搭大飛，開始另一個島嘅活動。

2014.02.21 Galápagos Islands - San Cristobal Island

                                                        Galapagos Islands

                                                              Snorkel diving

2014.02.21 Galápagos Islands - San Cristobal Island

噚晚開唔到會，臨瞓前將所需文件都預備好。今日一早執好晒行李，走出大堂，團友亦陸逐晒出嚟。旅行團嘅當地職員點齊人數，收集好文件，大家登上一早喺門口預備好嘅小巴。就直去機場。

旅行團職員協助我哋搞掂登機手續後，就喺閘口講拜拜，我哋呢團人，就要潮州音樂，自己顧自己喇。參加得呢種旅行嘅人，自顧能力都相當高。多數團友喺呢個旅程之前或之後，都仲有其他旅遊點。呢個加拉巴哥斯之旅，只不過係整個旅程內其中一環而已。好似我咁，遊完加拉巴哥斯，就會去秘魯利馬。

我之所以要嚟探訪加拉巴哥斯群島，必須重提一下歷史：

十九世紀，英國皇家海盜橫行世界。帝國要霸靚地，就要做勘探。1831年，皇家海軍獵犬號 HMS Beagle 由英國出發，目的係勘探南美洲資源，所以，一大隊自然科學家，隨軍艦出發。喺南美西岸，離岸好遠處，有一堆群島。科學家發現好多古怪生物，例如成架車仔咁大嘅陸地龜，會潛水嘅蜥蜴，會潛水嘅雀仔⋯⋯等。

船上有個廿零歲嘅科學家，查理士，佢發覺相同嘅生物，生活喺離島嘅，同生活喺內陸嘅，喺形態上，居然有咁顯著嘅分別。佢開始懷疑生物並非一成不變，觸發起佢建立生物演化理論嘅概念。看官一定知道，呢位查理士，就係達爾文。而呢堆離島，就係離開厄瓜多爾海岸1000  公里嘅加拉巴哥斯群島。

1979年，睇BBC嘅13集生命之源，我第一次聽到呢個島名。主持人大衛愛登堡企喺巨龜前，講述達爾文嘅生命演化理論⋯⋯。Hah，唔知邊一日，我有機會企喺巨龜前面，可以向呢位「演化」巨人表示敬意 呢？ ⋯⋯。

三十五年後，我就登上呢架飛加拉巴哥斯群島嘅飛機。真係有心唔怕遲喎。

飛機由基多出發，先停海邊城市 Quayaquil，再向西跨過一千公里海程到達東面大島 San Cristobal。

整個群島都係受保護區域，登機前已經撿查行李，入境前又要再查一次，所有生果都唔准帶入。大家都知，環境保護，所費不菲。所有外國遊客，入境時，都要繳交美金一百大元，以資助群島環保支出。

機場外，領隊及旅行團職員已經喺門外等候。我哋呢團個個都係後生仔女，其中當然包括內心後生嘅我，梗係快手快腳，好快就集合全團，一齊登上小巴，向旅館出發。

個島只有一個大鎮 town of Puerto Baquerizo Moreno，就喺機場嘅西面。十零分鐘車程就到旅館，大家分房整頓不在話下。第一件重要事，就係問 wifi password，跟手發個短訉報個平安，就係指定動作喇。

領隊約咗兩點集合，大家趁住少少自由時間，三三兩兩即刻走出街，四圍逛逛，兼食午餐。今日第一日，同大家唔係咁熟，我自己一個人四圍行。

果然係赤道，又曬又熱。不過好奇怪，雖然係海島，又唔覺好潮濕，熱得唔太辛苦。一行出街，行人路、長櫈底、樹蔭下，不時都睇到海蜥蜴 Marine Iguana 伏喺度唞涼。海邊到處都見到海獅，三三兩兩，有啲游緊水，有啲曬緊太陽，有啲攤喺蔭涼處瞓覺，佢哋都好似渡緊假。紅石蟹 The Sally Lightfoot crab，喺海濤不斷沖擊嘅礁石上爬嚟爬去，鉗食石上嘅海藻。有時仲爬上瞓緊晏覺嘅海獅，海獅發起脾氣，用巨掌一撥，可憐嘅紅蟹跌咗落不斷起伏嘅浪潮，又要費一番力爬番上礁石。⋯⋯。呢啲景象，真係好似睇 Discovery Channel 。

島上好多地方都見到有達爾文像嘅石碑，又係喎。San Cristobal 島就係當年獵犬號最先登陸嘅地方，再唔駛講逹爾文同群島嘅關係咁密切，達爾文就梗係群島嘅標誌人物喇。

走入一間海邊餐廳，開放式餐堂，天花吊扇，轉下轉下吹住熱風，食客懶洋洋嘆住凍飲。嘩，好鬼有 tropical feel。可惜，我實在冇乜時間欣賞，要喺兩點前返番旅館，趕頭趕命食咗個焗魚薯條加涷啤，即刻埋單走人。

集齊全團十六人，開始下午活動。鎮上嘅主街就係沿海邊嘅一條街，我哋一群人跟住領隊一齊行。沿途都係野生動物，路上、海邊、水裏、天空，到處都有。領隊見到乜就講乜，但始終都係一個調子：呢處地方本來就係動物嘅屋企，人類之後走入嚟住，就要尊重原生動物嘅生存權，更加要保障佢哋日常生活，唔會受到過份嘅騷擾。遊客觀察野生動物當然可以，但係，睇就好嘞，最後由後面睇，唔好企得大太近，更加唔好掂佢哋。

為聽日潛水做準備，我哋去到一間潛水店租器材。如果玩水肺潛水嘅，就要出示證書，至可以租設備。我淨係識徒手潛水，只租面罩、吸管同蛙鞋就搞掂。

領隊好醒目，佢唔需要問你班友潛水有幾叻，跟住嘅節目就係試用具。我心腸唔好，用陰謀論睇人。佢口講話試用具，實在就要試下你班友嘅水性。正所謂，講乜都冇用，一試便知龍與鳳。，

由主街去潛水地方，要行半粒鐘至到。途中經過一個展覽館，成班人走入去，企定定聽領隊講解加拉巴哥斯群島嘅概況。

加拉巴哥斯唔係一個島，係由大大小小，約130 個散喺附近嘅島嶼及礁石所組成嘅一堆群島。群島喺正赤道，即係話有啲喺南半球，有啲喺北半球。嗰度正正係三個大板塊嘅交滙點，海底火山活動頻繁，地表嘅弱點就變成火山。群島嘅東面係老化嘅火山，所以咁上下就因為火山泠卻，而紛紛陷落。有啲更被大海吞噬，最終埋沒海底。而西邊仍然繼續噴發溶岩，不斷生成新嘅土地。所以加拉巴哥斯群島嘅地形，仍然喺不斷變化之中。又因為有冷流經過，海底岩漿一湧出即刻凝固，所以附近海牀都特別淺水。

群島距離南美大陸一千公里，加上信風、冷暖洋流嘅影響，形成世界上獨一無二嘅生態環境。

領隊亦略略介紹呢幾日喺各個島上嘅活動，同埋有關注意事項。

大家喺風扇底下聽佢噏咗成粒鐘嘢，個個差啲瞓著。講課終於完畢，繼續趕路去潛水。

潛水地方只係一個崖邊嘅小海灣，仲有幾隻海獅伏係附近石上，懶洋洋睇住我哋呢班儍仔儍妹。大家都好雀躍，戴上潛水裝備，即刻跳入海中，親身感受慕名已久嘅加拉巴哥斯海水。水底植物唔多，亦冇乜珊瑚。但係都有不少魚群游嚟游去。我即刻同台灣墾丁作個比較。就講海底風景，呢個灣唔夠墾丁靚。

領隊考緊我哋，梗係要騷啲潛水技巧畀佢睇。我又鴨潛、又噴管、又清鏡、又攤屍，總之玩嘢，冇嗰樣搞嗰樣。又咁講，嚟得呢啲團，都要一定程度染上啲啲過度活躍症，個個都玩得好開心。領隊見個個入水能潛，梗係收貨喇。

夕陽就喺西面水平綫，亦係時候返歸沖番個靚涼。

呢一晚係第一餐齊齊整整全隊人，一齊食嘅晚餐，領隊帶咗我哋去一間燒烤餐廳。庭院式開放餐堂，棕梠棚架，碎石地，中間一個又大又長嘅燒烤爐。燒雞、牛朳、羊朳等就梗有。呢度四面環海，點少得海鮮。燒全魚，鮮蝦，帶子、魷魚⋯⋯。咁多美食，個個左諗右諗，都唔知食乜好。我諗都唔駛諗，就嚟個大雜錦，乜都有啲就最好喇。

跟手嚟支冰凍啤酒就冇走雞喇。「對唔住，今日唔賣啤酒」。乜話？BBQ 冇啤酒？原來今日係全國縣政府大選投票日，全國禁酒，所有酒精類飲品都唔准賣。我記起舊年喺尼加拉瓜，又係遇到選舉日，又係禁酒。都啱嘅，酒能亂性。選舉咁緊要，大家都唔想出乜嘢亂子嘅。不過，我呢餐BBQ，有餚無酒，梗係美中不足喇。

冇飲飽，但係食醉之後，喺月色下行返旅館。後生仔女，果然單料銅煲，一餐晚飯後就鬼咁熟落。一路行，仲一路雞啄唔斷，天南地北乜都噏一餐。行過海邊，月影下嘅沙灘，瞓滿海獅。原來海獅早出晚歸，一大清早游到冇雷公咁遠，到夜晚至返嚟。游咗成日水，梗係要瞓番夠本喇。我哋唔嘈佢哋，靜靜地，返屋企。因為，聽日好早要起身去潛水。

2014.02.20 Cotopaxi volcano

                                                              Cotopaxi Volcano

                       Mountain biking 

2014.02.20  Cotopaxi volcano 

同噚日嘅集合地點原全一樣，冇行錯路，順利準時到達，已經有好多人等緊。冇耐，一架車頂載住好多單車嘅小巴駛到，呢架就係今日載我哋去 Cotopaxi 火山嘅專車嘞。職員點名上車，略略介紹整日行程，佢講完就落車走人！咦，邊個係領隊呢？

好以噚日一樣，小巴沿泛美公路 Pan American Highway 一路向南行，約一個鐘車程左右，嚟到公路邊一間餐廳，原來領隊已經喺門口恭候大家。個個都未食早餐，全體落車，先搞掂個肚先。雖然喺赤道附近，話晒都係山區地方，早上都幾寒㗎，餐廳裏面壁爐仲燒起柴火，暖就暖嘞，可能係個煙卥唔係幾掂，搞到呼吸都有啲困難，要打開門透氣。唔怪得當年許冠傑，喺尼泊爾差啲畀啲煙焗到 short 咗。

通常就餐時候，就係互相介紹嘅時機，亦好自然用語言分成兩堆人，一堆用英文，一堆用西文。

一個悠閒自在嘅早餐後，專車繼續南行，再向東轉入 Cotopaxi 國家公園。上山前，有個管制站，所有進入山區嘅車輛都要登記，同埋畀入場費。厄瓜多爾旅遊局亦規定，帶團嘅領隊都要有專業證書。如果帶行山遠足嘅，又再要符合相関嘅專業資格。

上山嘅路係全新鋪成，後半截，鋪路工程仍然進行緊。小巴由海拔二千幾上到三千幾，喺一個管理站稍作停頓。呢度有個觀景台，可以遠眺整個火山。有售賣紀念品嘅小賣部、亦有售賣咖啡等飲品小食嘅茶水間，又有一個小小展覽室，略略介紹  Cotopaxi 火山嘅資料。

Cotopaxi 火山，喺基多市南面 50 公里，係世界第二高活火山。五百年來，爆過86次。本世紀嘅觀察，發覺冒硫磺煙多咗，而且冰川一路熔化，一路向上移，意味住火山温度一路上升。唔好忘記，呢個火山一向都好活躍，冇人知道下一次噴發時間係幾時。不過幾時都好，對我嚟講，最緊要唔係今日就得嘞。

導遊略作講解後，小巴就沿住碎石路繼續上山，去到四千六百公尺嘅停車場。落咗車之後，就發覺好大風、好凍，即刻加上風褸。今日有兩個目的地：其一係上到四千八百公尺，嗰度有間屋仔正在興建緊，然後回頭。如果仲有力，可以上到五千一百嘅冰川底部，先至回頭。領隊再三警告，呢度係四千幾公尺，要放慢嚟行，有問題就即刻落山。

我持住曾經上過高山，梗係一馬當先，拋離大隊，好彩都係喺同一個小坡上，離遠都睇到對方。上山落山都係一條路，唔會輕易走失。

山上天氣果然難測，時而天晴，時而霧掩，無端端又吹起大風，忽然又夾雜住小雨。總之變化多端。行行下，我嗰團只剩我同另一個後生仔一齊，其他人仲喺山腰好遠嘅地方。

好快就行過咗四千八嘅屋仔。當然仲仍然有心有力，咁就當然繼續。再上到約五千公尺，路邊已經有一笪笪嘅積雪。再上高啲回望，呢啲一笪笪嘅雪喺排列喺山谷上，喺幽暗嘅環境襯托下，居然好似山谷上嘅萬點星光。咁大個仔，未見過咁靚嘅景象，可算值回票價喇。

愈行愈興奮，居然追上前一批人。咦，前面唔係冰川係乜嘢。已經有人大叫，又喺冰川跳嚟跳去影相。原來冰川嘅尖端底部不斷溶化，冰變成水向下流，因此尖端底部形成冰洞。個個排隊走入冰洞影相，非常個癮。居然畀我發現，冰洞前有一笪較平嘅空地，雖然唔夠長連續打三個側手翻，分開逐個打，打夠三個都係可以。即刻叫附近肥妹仔幫我揸機。一、二、三，終於完成，當然又贏得掌聲。

赤道嘅冰川，世界上唔係好多。咁難得上到嚟，大家都坐喺度，享受一下，處身白茫茫嘅冰帽，靜聽呼嘯嘯嘅風聲，呢種咁特別嘅感覺。不過，實在都唔坐得好耐，山高風大，愈坐愈凍。都係時候落山。上山嘅時候，因為斜坡，所以要走「之」字路，落山就唔同嘞，就踩住碎石，直接用直綫，一路行，一路跣落山，好似溜冰咁，完全唔駛點用力。又因為落山路線不同，所以冇同大隊相遇，我哋落到四千六停車場，大隊仲喺山腰慢慢落緊嚟。

等人齊，第二個節目又開始喇。由停車場踩單車落山，去番三千幾海拔嘅一個湖做終點。咁樣踩落山，唔係容易，條路雖然好闊，但係好斜，路面完全凹凸不平，兼且佈滿大大小小嘅碎石。落緊斜嘅單車，就算你剎住制，架車都會一路跣落山。所以剎制唔可以剎死。控制單車把手，既要控制得到，又唔可以楂得太緊，呢啲經驗，唔係個個人掌握得到。有幾個團友試踩咗一陣，控制唔到，唯有放棄，坐返上車罷嘞。全團只有五個人踩車落山，我咁貪玩，點少得我。喺海拔四千幾高度，活火山嘅山坡踩單車落山，咁仲唔係個人新紀錄。

過程中，我只跌過兩次，只係擦損少少膝頭，就順利完成呢個約一個鐘嘅單車落坡旅程。喺湖邊逗留一陣，稍事休息，又係踏上歸途嘅時間，此時已經接近三點。咦，我哋個午餐去咗邊？先至醒起，成班友仔玩到食晏都冇時間。原來貪玩，真係會唔記得肚餓。個午餐係包嘅，旅行社亦好公道，午餐遲咗，都唔會走數。成班友車晒去今朝食早餐嗰間餐廳，大家排排坐，食個四點鐘嘅午餐。冇所謂喇，嚟自世界各地嘅朋友，又一路食，一路大話西遊嘞。

原本今日五點鐘，係加拉巴哥斯島之旅嘅開會時間，我六點幾至返到旅館，一早已經散咗會。問番團友，原來只係檢查文件，同埋交待明天出發時間。好喇，今晚早啲瞓，明天，加拉巴哥斯島之旅，正式開始。

2014.02.19. Animal market, Laguna Quilotoa

                                                                  Alpaca

                            Llama

2014.02.19. Animal market, Laguna Quilotoa

終於可以瞓個正正經經嘅覺。今日活動集合時間係七點，我習慣早起，毫無問題。集合地點係  La Mariscal 區嘅一間餐廳門口，由旅館行去，只需十幾分鐘。

今日帶我嘅係 Pedro，噚日喺旅行社已經見過佢。佢去過加拿大工作，英文溝通，冇問題。七點鐘，佢同佢架四驅車已經喺度恭候，我哋準時出發。

今日去嘅第一個站，係距離基多市 90 公里車程嘅 Saquisili 鎮。每個星期四，山區裏面嘅原住民就會帶佢哋嘅牲畜出嚟賣，之後，佢哋亦買啲必需嘅嘢返屋企。每條村嘅原住民都有唔同顏色、唔同款式嘅帽、披肩、圍巾等服飾。當地人一睇就知佢哋來自何方。所以，巿場內嘅人都五彩繽紛，非常有特色。墟期只係每周一次，咁都畀我撞正，要買張六合彩喇。巿場其實就係一塊大空地，用木欄杆分區，每區賣唔同嘅牲畜。

牲畜市場雖然有趣，其實都唔係幾好行。唔係因為臭味同埋污糟，而係始終代表屠殺。買嚟做乜，就係要殺嚟食。我都食肉，但係見到佢哋一隻二隻，用無助嘅眼神望住你，心裏面點都唔好過。故君子遠庖廚，不忍聽其聲，常情也。

市場冇特定㰙檔，就係空地一塊。賣家將牲畜趕到圍欄內，綁埋一齊，就善價而沽。買家睇中邊隻，雙方議價妥當，一手交錢，就將牲畜牽走，咁仲唔係生離死別係乜？見到有母豬同幾隻小豬，有人買走小豬，小豬不明不白，畀個唔知乜嘢人帶走，當然驚到大叫。呢邊廂，母豬見人帶走佢啲乖乖，又叫埋一份。勞動買賣雙方，又拉又打又鬧，至攪得掂。親眼見到拆散大好家庭，雖然係豬家庭，點都係有啲於心不忍嘅。

豬牛羊，我哋見得多。因為抗議網絡管制，而走紅神州大地嘅神獸草泥馬，呢度都有得賣。呢隻畀人改咗名嘅動物，真名其實係 Llama 或者 Alpaca，係兩種唔同嘅動物。不過又可以交配生咗另一隻動物。關係就好似馬，驢、騾咁上下。兩隻動物外型十分相似。Pedro 話，主要分別在於面型，Llama 吻部比較突出，而 Alpaca 則較短及圓。兩種動物嘅毛都可以紡織，但以 Alpaca 毛較柔軟。兩者都可作食用，仍以 Alpaca 嘅肉較可口。呢隻神交已久嘅動物，今日咁近距離相見，但居然喺牲畜巿場，確令人神傷。

今日早起，都未及食早餐。我哋離開牲畜市場，Pedro 車我到附近一間餐廳仔，食個厄瓜多爾傳統早餐。成個南美洲受西班牙影響好深，其實好歐化，呢個早餐好豐富，又多士又沙律，主菜係一碟雞飯。味道都係咁上下，算係領教過當地食物喇。

順道再行下當地市場，都係一般市民日常買嘢嘅地方。我鍾意行街市，咁樣可以睇到一般人民生活狀況。行過一檔，紙皮箱內放住一隻一隻豚鼠 Guinea pig、白兔，好不幸，呢啲唔係寵物，係食物。南美洲人，好多都鍾意食豚鼠。幾百年前，古印加皇朝，豚鼠係專要嚟，供應畀皇親國戚大人物亨用，係高級食物。今時今日，遇有慶典、節日，豚鼠都係不可少嘅美食。又行過一檔，賣貓賣狗！唔駛驚，南美人唔興食貓狗，呢啲真係寵物。真麻煩，食物同寵物擺埋一齊賣，千祈唔好搞錯就得嘞。

美洲西岸，喺正板塊邊緣，所謂 Ring of  Fire，到處都係火山，厄瓜多爾就喺正呢個火山環之內。國內著名嘅 Cotopaxi 火山，就係世界第二高活火山。我哋今日所行嘅路，亦係圍住Quilotoa 火山嚟行，呢條環迴路線，就稱為 Quilotoa loop。四驅車就沿住呢條路奔馳，深入好多人跡罕至嘅山間村莊。四驅車再向山上爬，就到咗今日嘅主角： Laguna Quilotoa ，泊好車後，行去觀景台。先至發覺，我正身處火山口外環  rim of crater, 高度係 3800 公尺。由觀景台望出去，就係一個圓碌碌，直徑 3000 公尺嘅大火山口。向下望，就係一個火山湖，啲湖水藍到好似睇卡通片一樣。真係好靚。

觀景台旁邊有條小路，一直落到火山口內嘅火山湖邊。我點會錯過呢個行落火山口嘅機會，所以一早已經著定行山靴。小路好窄、好斜，亦好多碎石，好容易跣腳，我裝備齊全，梗冇問題。由頂部望落去，湖面睇嚟好近，不過，慢慢行，都行咗成個鐘至到。湖邊沙灘，居然有人出租獨木舟。唔知係唔係淡季，今日遊人稀少。呢盆火山口生意，真係唔知做唔做得過。

落到火山口湖邊，抬頭四望，畀山氹氹轉圍住。四面環山，就係呢個感覺。湖邊沙灘，其實都唔係好多地方行。行遠些少，就已經係山連水嘅峭壁。我四圍影下相，坐喺湖邊石上，感受下火山口嘅寧靜。費事太過粗勞，落湖前已訂咗隻馬仔，由火山湖載番我上嚟。

旅行社都好君真，呢次旅遊，仲包埋我一餐午餐。觀景台附近就有幾間餐廳，行入去至知，原來唔只係餐廳，仲係小旅館。附近有行山徑，單車徑。喺呢度行下山，hea 佢三兩日，真係暫時逃離俗世嘅不錯選擇。

今日，Pedro 陪咗我成日，我咁八卦，梗會問佢有關厄瓜多爾嘅狀況。厄瓜多爾算係民主制度，係一人一票選總統、同埋地方政府。而家咁啱，就係選緊省政府。佢仲話，厄瓜多爾一啲都唔窮，有石油，農產品十分豐富，旅遊業亦好發達。但係過去嘅政府，非常貪汚腐化，人民冇受益，而且社會亦唔穩定。現屆政府上台，大肆改革，掃除貪污，好得民心，佢自己就大力支持呢個肯改革嘅政府嘞。哦，原來佢係一個改革派。

我又同佢提起，厄瓜多爾將中式炒飯叫做 Chaulafen ，我估計，其實係炒冷飯嘅音譯，又將每個中文字嘅意思講畀佢聽，佢覺得好趣。當佢車我返旅行社，我仲中英對照咁寫畀佢睇。唔⋯，咁算唔算文化交流呢，又。

再三確認明日嘅行程，心安理德返歸瞓覺喇。

2014.02.18 世界中心，電訉山

2014.02.18 世界中心，電訉山

瞓得唔夠三粒鐘，又要起身。冇法喇，貪玩就係咁嘅喇。

噚日叫咗旅館，幫手安排啲節目，佢滿口應承。今朝去櫃台打探一下，原來佢幫我安排咗架車連司機。咁唔係我所想，其實我係想參加啲一日團。不過既來之則安之，咁樣包架車一日，六十蚊美金，又唔算貴，殺你。

由基多市區向西北行廿幾公里，就到達 Mita de Mundo, 直譯就係世界中心。標誌塔喺上世紀八十年代初建成。呢個赤道地界，用日照測出，但係有咗 GPS 定位之後，就知道呢條線已經唔夠準確。但係基於歷史因素，紀念塔仍然視作赤道標記，遊客仍然嚟呢道影相。

赤道綫咁長，冇人霸得晒。有生意頭腦嘅人，就會藉此揾食。附近有人就另擗場地，收入場費，示範「赤道」兩邊，洗手盆流水旋渦方向不同嘅表演。當然，呢啲係揾苯掩眼法。有乜理由，人為劃條綫，咁近距離就有分別。既然揾苯，亦冇乜好去，只去呢個冇咁準確嘅官定地界。呢度泊車要三蚊，再要收入場費每人又三蚊，我畀埋司機嗰份，陣間影相都有人幫手揸機。

大石碑前有一條寛闊通道，兩旁擺咗十幾個，對地球定位有貢獻嘅科學家嘅雕像。石碑中間有個小展覽廳，唔知點解今日唔開，睇唔到，真可惜。畀咗錢走入嚟，梗係用盡佢。氹氹匝，兜住石碑，慢慢行個大匝。

喺東向零度零分零秒赤道界影相，就梗嘅嘞。我點會滿足於，就咁用兩腳跨過赤道界影相。影相硬照有手倒立，錄影就有側手翻過赤道，仲有沿住赤道連續側手翻，就係我嘅指定動作喇。好彩有人揸機，遊人亦唔多，影得好他條也。

赤道塔周圍都係賣紀念品嘅小鋪頭，其實都係千篇一律嘅貨式，唔好再講話費事拎。不過嚟到南美，買隻草泥馬公仔都過癮嘅。除咗紀念品鋪頭，就係食肆。我哋可能嚟得早，好多食肆都未開，遊人亦小貓三四隻。又係嗰句，生意難撈。

逗留唔夠兩個鐘，就驅車走人。一直回頭向南走。第二個要去嘅地方係電訉山 TeleferiQo。基多市根本就係一個山谷城市，周圍都係山，電訉公司喺西面山頭，起咗好多通訉用嘅鐵塔。因利成便，起埋吊車上山頂，方便工作人員，又可以做旅遊生意。

其實可以自己搭車去山腳，再搭穿梭巴士去吊車站。我就直接車上去停車場，自己一個人買飛上山。基多市本身已經海拔二千幾，山頂站係海拔四千公尺，好多人已經會有高山反應，所以一舉一動都要放慢手腳。再者，高山亦會大風，而且幾凍。我做咗功課，帶埋羽絨嚟搭吊車。

山頂站附近起咗好多觀景台，都係居高臨下欣賞基多市嘅好地方。周圍亦有行山徑，洽路仲可以行到 4600 公尺，Rucu Pichincha 山頂。沿途風景好就好嘞，不過冇遮冇掩，又曬又大風。既然上到四千幾，我亦唔好嘥，喺呢度行咗個幾鐘頭山，算係為兩星期後，行印加古道做下準備。

司機帶我去一間厄瓜多爾餐廳食飯，之後車我返酒店。

跟住嗰兩日嘅行程都未有著落，睇嚟，要自己親自出馬。喺市中心揾到間旅行社，行人去，直接問有冇明日、後日嘅旅行團。後日就有一團，咁我梗即刻科水報名。明日就冇團，不過都可以幫我做個一人團，價錢當然稍貴。我將兩個團加埋除二，咁都唔算太貴。嚟得旅行，有得玩就算數喇。

聽日又要早起身，今晚早啲瞓，補返前兩晚失去嘅睡眠。

2014.02.17 基多，舊城，麪麭山

2014.02.17 基多，舊城，麪麭山

終於都有張牀，梗係舒服，雖然唔夠暖，都係有得震，又有得瞓，唔好怨喇。我有番四粒鐘補下對眼，已經好夠。旅館有早餐賣，每位五蚊美金，都係啲蛋、多士、咖啡，冇乜特別。值得一提嘅，就係我去過嘅中南美洲國家嘅早餐，多數有生果沙律同埋攪伴嘅果汁，對腸胃絶對有好處。

第一件事要做嘅，就係搞清楚而家身在何方。噚晚夜孖孖嚟到，四圍黑漆一片，仲驚死呢度離市中心好遠，好唔方便。一睇地圖，都唔錯喎，原來我身處新舊城交界，好多景點都係步行距離。

食過早餐，執好背囊仔，攞住地圖，即刻出發。臨行前，再次向旅館交侍遺失行李嘅事，並叫旅館記住機場會聯絡我哋。

一出街，已經同返工返學嘅人潮融理一齊。馬路上汽車、巴土，車水馬龍，繁忙得很。每一個燈口，都有幾個指揮交通嘅警察，一路吹哨子，一路喺度手舞足蹈，維持路面秩序。警察吹哨子好有技巧，一啲都唔刺耳，最初仲以為係雀仔叫聲。行人同駕駛者都好守規矩，叫停就停，冇話衝燈，繁忙而有序。第一個印象，唔錯。

由旅館一直向南行就係舊城 Historical City。新舊城交界處，係 El Ejido 公園，只係市中心嘅公園，唔算大，公園有單車徑穿過。除咗行人外，三三兩兩嘅組合，各據一方，享受鬧市中嘅一點寧靜。公園內居然有流動投影電視，播放電影。又有組合表演默劇，又有人演講，我唔知佢噏乜，睇嚟係戙篤笑。表演似乎都係自發，都圍咗一堆一堆嘅觀眾，為生活增加色彩。

離開公園，沿路都係鋪頭，好繁忙嘅街道。馬路近行人路嗰條行車缐，有矮石壆分隔其他行車線，只准電動巴士，及緊急車輛行駛。電動巴士，好似電車咁，頂部有兩條接電桿以供電源。咦，咁樣，係唔係叫無軌電車啱啲呢。路邊有密封巴士站，買飛、排隊上落車都喺裏面進行，非常有秩序。

基多市 Quito，正式名稱叫 San Francisco de Quito。雖然喺赤道，但係位於二千八百公尺高地。早上都好清涼，早起嘅行人都著住褸或外套。但係到咗中午時分，喺正太陽底下行街都幾熱，不過一有蔭頂，再加上涼風，行起嚟都唔算辛苦。呢度出街一定要預備些少禦寒衣物，因為風吹埋嚟都幾涼下。

慢慢行約半個鐘就到舊城。先去大廣場坐低，攞住地圖，睇下自己位置，再睇下跟住點行。

基多市獨立廣場 Plaza de la Independencia，當地人稱大廣場 Plaza Grande，絶對係厄瓜多爾政治中心，正副總統府及重要政府機構都喺周圍。因為歷史原因，好多歷史悠久嘅大教堂亦喺附近，全部都喺步行距離。遊基多舊城，必定由大廣場開始。

廣場每一個位置都坐滿人，有本地人、有遊客，非常熱鬧。而且臨近縣政府選舉，到處都貼滿候選人大幅照片及政綱。又擺街站，派競選單張，更顯熱鬧。廣場北面係總統府，據講有免費導覽團，我喺外圍行咗個匝都見唔到。算罷喇。

西面係 Cathedral of Quito，我行入去，裏面好大，四圍都係好大幅嘅壁畫。大門口嘅壁畫，就講述耶穌驅逐將聖殿變成街市嘅人。此後一幅一幅嘅壁畫，順述講述最後晚餐，被捕、受審，行苦路、釘十字架至升天嘅故事。教堂做緊彌撒，我放輕腳步慢慢行，參觀呢個教堂。

出番教堂，門口見有個女仔，帶住一對夫婦遊客。聽到佢講英文，連隨埋去，攞咗佢嘅電郵電話。如果需要人帶遊舊城，又有時間嘅話，就可以揾佢。

圍住廣場，繞住附近街道，兜個大圈，四昅下。

抬頭一望，基多女神像 La Virgen de Quito ，就高高豎立喺廣場南面高200公尺嘅山崗上，嗰度就係麪麭山 El Panecillo 。上山小路，清晰可見，而且唔難行。旅遊書警告人唔好行路上去，話有危險，不過又冇講乜嘢危險。我點會犯險，就喺山腳處截架的士，三蚊雞上到頂。後來同人講起，原來上山路邊有好多野狗，有可能會襲擊途人。唔知書上面講嘅所謂危險，係咪呢啲嘢呢？抑或人類比野狗更加危險呢！

呢度到處都會聽到南美竹排笛聲，主要景點，梗有人播住背景音樂吹奏竹笛。佢哋賣自家製 CD、樂器，亦歡迎多多打賞。一路欣賞風景，一路有南美音樂做背景，係好有風味噃。

麪麭山係一個錐形圓頂山，好似一個典型嘅小火山，喺正基多市中心。我喺山頂氹氹匝行一個大圈，大基多市 Greater Quito 就盡收眼底。再畀兩蚊，行上45公尺高女神像睇市容，就更有風味，因為真係好大風。咪以為容易上，呢度其實已經係海拔3000公尺以上，要慢慢上，喘氣都有排你喘

慢慢行，喺山上 hea 佢一粒鐘，截的士落番廣場。咦，兩蚊都 OK 喎。由廣場行過副總統府，對面有間老翻家鄉雞嘅餐㕔。睇下鐘，都係時候食晏，走埋去睇下個餐牌。哈，有個餐好過癮。唔駛四蚊一份餐，八分一雞加沙律，仲有杯百事，同埋 chaulafen！乜嘢嚟？根據我嘅估算，就係「炒冷飯」，梗係我哋廣東先民登陸厄瓜多爾，將民間美食帶嚟。嗰時唔叫  fried rice，就音譯變成 chaulafen 喇。後來，同當地人講起，原來厄瓜多爾人叫唐餐館做 chaulafen restaurant ，或者 chaufen restaurant，但係佢哋唔知有乜分別。當我解釋炒冷飯同炒飯嘅分別。佢哋都覺得好得意。哩，呢啲咪係文化交流囉。

原路向番北行，冇遠就係 Basilica de Voto National。南面雙鐘樓，北面亦有高塔。大教堂建喺山坡，加上高塔離地115公尺，呢度梗係高點睇景必到之處。畀兩蚊入場，雙鐘樓有電梯上頂。特別之處，係要穿過屋頂內中間，由南至北嘅朩板通道，再爬兩次鐵梯，至可上到北塔瞭望台。鐵梯又高又直，一路爬，一路睇到條街就喺腳下，感覺十分驚險。如果畏高，就絕對唔敢上喇。由瞭望台向下望，360度睇晒新舊城，同麪麭山女神像遙遙相對，雖然驚險，上到嚟，冇話後悔。果然冇介紹錯，呢度係必到之地。

回頭一路向北，再次穿過公園繼續向北走向新城。呢度係市中心區，銀行、商業大厦、大酒店都喺晒呢邊。再向北走多少少，就係 La Mariscal，到處都係食肆、小旅館。我初嚟步到，唔知乜頭乜路，後來至知，原來呢個區係旅客集中地，一到夜晚，燈光通明，到處都係嚟飲飲食食嘅人，熱鬧非常。

噚晚冇覺好瞓，又始終記掛住唔見行李呢件事。往回走，經過一間唐餐館，買咗盒雜會炒冷飯，拎番旅館慢慢嘆。

基多市每日温差都幾大，到咗五點零，多數有積雲，又開始吹涼風，仲經常灑一陣小雨。我一路冒住小雨行番旅館。櫃臺畀我一個好消息，機場有電話嚟，話件行李已經飛緊嚟。仲話，飛機一著陸，就會直接送嚟酒店。為安全計，我叫櫃台打多個電話去機場，再三確定旅館位置及聯絡方法。咁就安心返房食厄瓜多爾炒冷飯喇。

今晚點瞓得著。十一點，仲未嚟。一點、二點。⋯⋯ 忍唔住，摷醒櫃台叫佢再打電話。終於確認，行李已經喺路途中。⋯⋯ 終於，四點四十五分，行李送到。即刻再三撿查，確定乜都返晒嚟。好咯，碌上牀，大覺嗦。

噚晚，四點瞓。今晚，成五點至有得瞓。旅行，係咁嘅喇。

2014.02.16 雪梨，LA，邁亞美，基多

2014.02.16 雪梨，LA，邁亞美，基多

每次旅行之前都好緊張，一瞌理眼就諗下，自己仲有乜嘢未做。起程日子終於到嚟，咁又放晒心喎，因為預備咗咁耐嘅事，而家要一步一步將佢付諸實行。

阿珊、大小姐撥冗嚟送機，預咗充足時間，雖然星期一交通繁忙，嚟到機場，仲有大把時間。即刻去櫃位登記。櫃位小姐望咗電腦好耐，左撳右撳都好似搞唔掂。最後佢話，呢班機改咗，我要搭另一班機。咁跟住嗰兩班接駁都有可能唔同，如果照登入，咁有可能唔見咗啲行李。於是建議我到咗 LA ，連行李再登記一次。又未遇過啲咁嘅事，再三問清楚，行李轆咗入去。呢個行程，就模模糊糊咁開始喇。

仲有時間食個麥記。喺禁區前嚟個熊抱，就大踏步行入禁區。老友，歡樂旅行團，正式出發。

以前過関，電腦要由行李攞出嚟，分開過機。而家帶 iPad ，又可以留喺行李裏面，咁就冇咁麻煩。

第一程機，由雪梨飛去 LA，飛行時間十三個半鐘。因為飛過太平洋換日線，十二點起飛，到步時間，時光倒流，變番同一日早上六點。呢十三個鐘，架飛機追住個太陽，變咗一個好長好長嘅白晝。喺飛機，眼光光瞓唔著就係常態喇。

航班到達 LAX 國際機場。迎住呢個隔夜朝陽，步出機倉。原來我屬於趕機之列，門口已有地勤人員等緊，佢畀咗一張紅色 Express 紙牌過我，我攞住佢就可以行特快道，有時仲可以打尖，唔駛排隊。唔係乜嘢，趕機梗係大晒。

領咗行李，再重新搞過轉機手續。果然有啲麻煩，自助電腦登機用唔到，要去櫃位做。原來跟住嘅兩程機完全冇變，咁，點解雪梨櫃位話要改呢？唔理得咁多，卒之要人手搞掂，再三詢問，要行李一直去到基多。櫃位小姐眼尾睄下寄行李紙條，好有信心咁講：「咪係囉，直去基多」。佢咁有信心，我梗信佢。即刻攞行李去寄倉，自己再次入閘，登機飛邁亞美。

由 LA 飛邁亞美，飛機望落遼闊嘅大地：有高山、平原；有好似四方形、圓形嘅城巿；又有浩瀚無邊、一片荒涼嘅無人地帶。飛五粒鐘到達邁亞美，隨即轉機飛厄瓜多爾。好奇怪，點解由美國出境，唔駛過海関嘅呢？

飛機向南，飛出墨西哥灣，過咗佛羅里達州最南一個小島 Key West，就飛入南美洲，晚上11點著陸。厄瓜多爾首都---基多，呢個完全陌生嘅國度，我來也。

機場整潔有序，工作人員都係年青嘅後生仔女，牆上貼滿介紹厄瓜多爾嘅大壁畫，呢度過境，絶冇令人不安嘅恐佈氣氛。

夜機都有幾班，用咗半個鐘至排到移民局。袋鼠護照毋須簽證，直接蓋印過關。以為好順利，點知等轆行李，等極都等唔到，好擔心，最驚係畀人攞咗。即刻問旁邊嘅工作人員小姐，佢識英文，問我個名，再用機一查，佢話我件行李仲喺邁亞美！佢咁講，我冇嬲，反而放心，起碼冇畀人偷到。辦好遺失手續，機場話第二晚會送到我住嘅旅館。

從未試過咁輕鬆過海關，冇行李畀人撿查。出禁區前，有海關人員截住我，用英文講「money！ money ！」。收黑錢？冇咁猖狂啩。幾經辛苦至知，佢問我有冇帶夠水腳，並且叫我攞畀佢睇。原來中南美洲好多國家，為咗鼓勵旅遊，旅客嚟自有聲譽嘅國家，都唔駛預早簽證。但係要出示去下一站嘅證明，例如機票。同理要證明有足夠銀両花費，例如現金或信用咭。呢一點，旅遊書都提及過，又話好少執行。而家要我 show cash, 我個樣一定好窮。真係想好似呂奇掟錢畀陳寶珠咁。嗱，錢呀嗱。

打開銀包，畀疊美金佢睇。一陣綠光，由銀包散出。嘩，咁大疊，邊有問題，即刻放行。佢又唔知，睇嚟好似知咁大疊，多數係一蚊紙嚟。

出咗閘，出口處有厄瓜多爾小姐，攞住上面有我個芳名嘅紙牌嚟接我。又英文，又西文，又郁身郁勢，雞同鴨，講一輪。大家搞清對方身分之後，小姐隨即安排一架靚車，送我離開機場。此時，已經係凌晨一點幾。

厄瓜多爾新機場，啓用冇幾年，靚就靚嘞，但離開基市中心多好遠。由機場去到旅館，都要個幾鐘。再加上我住嘅，唔係乜嘢出名大酒店，司機四圍兜，都揾唔到，最後更要畀錢的士司機帶路（點解冇GPS），咁樣搞咗一大餐，去到旅館，已經係凌晨兩點半。上埋面書，冲個涼，三點幾至瞓得。

好攰，應該好好瞓。半夜凍醒，已經冚咗兩張氈，乜呢度唔係赤道咩，乜嚟咁凍？震騰騰瞓埋下半夜。一覺瞓到天光。